Wednesday, September 24, 2014

പശ്ചിമേഷ്യൻ സംഘർഷം; പുതിയ വഴിത്തിരിവിലേക്ക്

ഇറാഖിന്റെ കുവൈത്ത് അക്രമണത്തോടെ പശ്ചിമേഷ്യയെ വരിഞുമുറുക്കിയ പാശ്ചാത്യ അധിനിവേശങ്ങൾക്കും അതിനെതിരെയുള്ള ചെറുത്തുനില്പുകൾക്കും വ്യത്യസ്ഥമായ മാനം നൽകിക്കൊണ്ട് മേഖലയിൽ പുതിയ പോരാട്ടവേദികൾ രൂപപ്പെടുകയാണു.  ഒരു ദശകം മുന്നെ പശ്ചിമേശ്യൻ സംഘർഷങ്ങളുടെ മൂലകാരണമായി ഗണിച്ചിരുന്നത് അറബ് ദേശീയതയായിരുന്നഉവെങ്കിൽ ഇപ്പോൾ നടക്കുന്ന പോരാട്ടങ്ങളിൽ അറബ് ദേശീയതയെക്കാളുപരി മതവും വിഭാഗീയതയും വംശീയതയും മുഖ്യകാരണങ്ങളായിമാറിയിക്കുന്നു. 

ഇറാഖിന്റെ കുവൈത്ത് അക്രമണം അതിനു ശേഷമുണ്ടായ  ഒന്നും രണ്ടും ഗൾഫ് യുദ്ധങ്ങൾ, ഉസാമ ബിൻ ലാദന്റെ പേരു പറഞ്ഞുകൊണ്ടു ആഫ്ഘാനുമേലുള്ള അമേരിക്കൻ അധിനിവേശം, ഇവിടെയൊക്കെ സംഘർഷങ്ങളിലെ പ്രത്യക്ഷ ഗൂഢാലോചകരും ഗുണഭൊക്താക്കളുമായി അമേരിക്കൻ സാമ്രാജ്യത്വത്തെ ഗണിക്കാമെങ്കിലും ഈ സംഘർഷങ്ങളിലെല്ലാം തന്നെ കൈനനയാതെ മീൻ പിടിച്ചത് ഇറാഖുമായും ആഫ്ഘാനുമായും അതിർത്തികൾ പങ്കിടുന്ന ഇസ്ലാമിക് റിപ്പപ്ലീക് ഓഫ് ഇറാൻ ആണെന്നു വിലയിരുത്തിയാൽ അതിശയോക്തിയാകില്ല.  1979ൽ  ഇറാനിൽ നടന്ന ഇസ്ലാമിക വിപ്പ്ലവത്തിൽ പരിഭ്രാന്തി പൂണ്ട് അമേരിക്കയുടെയും ഗൾഫ് രാഷ്ട്രങ്ങളുടെയും പിന്തുണയോടെ ഇറാനുമേൽ സദ്ദാം ഹുസൈന്റെ ഇറാഖ് നടത്തിയ അക്രമണത്തോടെ മേഖലയിൽ ഒറ്റപ്പെട്ടു പോയ ഇറാന് അതിശക്തമായി തിരിചുവരവിനു ലഭിച്ച അവസരങ്ങളാണു ഒന്നും രണ്ടും ഗൾഫ് യുദ്ധങ്ങളും അമേിക്കയുടെ ആഫ്ഘാൻ അധിനിവേശവും. ഈ തിരിച്ചുവരവിനും മേഖലയിലെ അധിപത്യത്തിനും നിമിത്തമായതും കൃത്യമായ കരുക്കൾ നീക്കിയതും ഇറാനെ തെമ്മാടിരാഷ്ട്രമായി എഴുതിത്തള്ളിയ അമെരിക്കയും ഗൾഫ് രാജ്യങ്ങളുമാണെന്നത്  വിരോധാഭാസമാകാം. സദ്ദാമാനന്തര ഇറാഖിലും താലിബാനു ശേഷമുള്ള ആഫ്ഘാനിലും അമേരിക്ക അധീശത്വത്തിൽ നിലവിൽ വന്ന പാവസർക്കാരുകൾ അമേരിക്കയേക്കാൾ ഇറാന്റെ താല്പര്യങ്ങളുടെ വിജയമായിരുന്നു എന്നു വിലയിരുത്തുന്നതിൽ തെറ്റില്ല. ഈ രണ്ട് ഭരണകൂടത്തോടുമുള്ള ഇറാന്റെ നിലപാടുകൾ ഈ താല്പര്യങ്ങളെ അരക്കിട്ടുറപ്പിക്കുന്നതുമാണു..

ഒന്നാം ഗൾഫ് യുദ്ധ ശേഷവും സദ്ദാം ഹുസൈൻ എന്ന രാഷ്ട്രതലവന്റെ സമഗ്രാധിപത്യം ശിയാ ഭൂരിപക്ഷ രാജ്യമായ ഇറാഖിൽ തുടർന്നിരുന്നുവെങ്കിൽ രണ്ടാം ഗൾഫ് യുദ്ധത്തിൽ വ്യക്തിപരമായി സദ്ദാം ഹുസൈൻ എന്ന ഭീഷണിയെ എന്നേന്നെക്കുമായി ഇല്ലാതാക്കുന്നതിനു പിന്നിലെ പ്രധാന ആസൂത്രകർ ഇറാൻ പിന്തുണയുള്ള ശിയാ ഭരണകൂടമായിരുന്നു എന്നതും പ്രസക്തമാണു.. അതൊടൊപ്പം തന്നെയാണു മുല്ലപ്പൂ വിപ്പ്ലവത്തെ തുടർന്നു സിറിയയിൽ ബഷാർ അൽ അസാദിന്റെ അലവി സർക്കാരിനെതിരെയുള്ള തദ്ദശീയ ജനതയുടെ ജനകീയ സമരവും ഈ സമരത്തെ ക്രൂരമായി അടിച്ചമർത്തിയതിനെ തുടർന്നു രൂപപ്പെട്ട സായുധ സംഘർഷവും ഇവിടെയൊക്കെ ബഷറുൽ ആസാദ ഭരണകൂടത്തിനു നിരുപാധിക പിന്തുണ നൽകിക്കൊണ്ടുള്ള ഇറാന്റെ നീലപാടുകളെയും നീക്കങ്ങളെയും നോക്കികാണേണ്ടത്. ചുരുക്കത്തിൽ ഒന്നും രണ്ടും ഗൾഫ് യുദ്ധങ്ങൾ, ആഫ്ഘാനിനെ അമേരിക്കൻ അധിനിവേശം, സിറിയൻ സംഘർഷം ഇതിന്റെയെല്ലാം കണക്കെടുപ്പ് കഴിയുമ്പോൾ അമെരിക്കൻ താല്പര്യങ്ങൾക്കൊപ്പം തന്നെ ഇറാൻ താല്പര്യങ്ങൾ കൂടെ വിജയം കണ്ടതെന്നു വിലയിരുത്തേണ്ടിവരും, മാത്രമല്ല മേഖലയിലേ ഏറ്റവും കരുത്തുറ്റ രാജ്യമായി ഇറാൻ മാറുകയും ചെയ്തു.

ഇറാഖും സിറിയയും കേന്ദ്രീകരിച്ചു ഇപ്പോൾ നടന്നുകൊണ്ടിരിക്കുന്ന പുതിയ പോരാട്ടങ്ങൾ ഈ സാഹചര്യത്തിലാണു സവിശേഷശ്രദ്ധയാകർഷിക്കുന്നതും. അമേരിക്കയുടെ പ്രത്യക്ഷവും ഇറാന്റെ നയപരവുമായ പിന്തുണയുള്ള ഇറാഖ് ഭരണകൂടത്തിനെതിരെയും ഇറാൻ പിന്തുണയുള്ള സിറിയയിലെ ബഷാറുൽ അസാദ് സർക്കാരിനെതിരെയും മേഖലയിൽ രൂപപ്പെട്ട പുതിയ പോർമുഖങ്ങൾ ഒരെസമയം അമേരിക്കയുടെയും അമേരിക്കൻ പിന്തുണയുള്ള രാജ്ങ്ങളുടെയും ഇറാന്റെയും താല്പ്യങ്ങളെയാണു ലക്ഷ്യംവെക്കുന്നതു. ഐസിസ് എന്നും ഇസ്ലാമിക് സ്റ്റേറ്റെന്നും സ്വയം പരിചയപ്പെടുത്തുന്ന സായുധസംഘത്തിന്റെ കടന്നുവരവ് ചർച ചെയ്യപ്പെടുന്നതും ഈ പശ്ചാതലത്തിലാണു.

ഇസ്ലാമിക് സ്റ്റേട്ടിന്റെ കടന്നുവരവും മുന്നേറ്റങ്ങളും ആകസ്മികം എന്നു പലരും വിശേഷിപ്പിക്കുമെങ്കിലും ഒരു സുപ്രഭാതത്തിൽ തട്ടിക്കൂട്ടപ്പെട്ട വിമതസംഘം അല്ല അവർ, മറിച്ച്  വേണ്ടത്ര മുന്നൊരുക്കങ്ങൾക്കൊടുവിൽ തയ്യാറെടുപ്പുകൾ നടത്തിയതിനു ശേഷമുള്ള മുന്നേറ്റമാണു അവരുടേതെന്നു നിരീക്ഷിക്കാൻ സാധിക്കും. വാസ്തവത്തിൽ ഒരു ദശാബ്ദത്തിനും മുന്നെ തന്നെ ഈ സായുധസംഘത്തിന്റെ ആദ്യഘടന രൂപം കൊണ്ടിരുന്നു. 2004ലാണു അബു മുസാബ് അൽ സർഖാവി അമേരിക്കാൻ അധിനിവേശത്തിനെതിരെ അൽ ഖൈദയുടെ ഇറാക് ഘടകം രൂപീകരിക്കുന്നത്. തന്റെ സംഘടനയുടെ കൂറ് ഒസാമ ബിന്‍ ലദനോടും അൽ ഖായിദയോടും പ്രഖ്യാപിക്കുകയും ചെയ്തു. 2006 ജൂണിലെ അമേരിക്കൻ വ്യാമാക്രമണത്തിനിടെ സർഖാവി രക്തസാക്ഷിയാകുന്നു. 2014 ആകുമ്പോഴേക്കും ഈ ഘടന പല ഘട്ടങ്ങളിലൂടെയും നേതൃത്വങ്ങൾക്ക് കീഴിലൂടെയും കടന്നു പോകുന്നു, ഇതിനിടെ നയപരമായ അഭിപ്രായ ഭിന്നതകാരനം അൽ-ഖൈദയുമായുള്ള ബന്ധം വിചേദിക്കപ്പെട്ടിരുന്നു. അതെസമയം സംഘടനയുടെ നിർണ്ണായക വളർച്ചയുടെ ഘട്ടം ആരംഭിക്കുന്നത് അബൂബക്കർ ബാഗ്ദാദി എന്ന അപരനാമത്തിൽ അറിയപ്പെടുന്ന അവദ് ഇബ്രാഹീം ബദ്രി അൽ സമറാഈയുടെ നേതൃത്വത്തിലേക്കുള്ള കടന്നുവരവോടെയാണു. സംഘടനയുടെ പേരു ഇസ്ലാമിക് സ്റ്റേറ്റ് ഓഫ് ഇറാഖ്  എന്നും പിന്നീട് പ്രവർത്തനം സിറിയയിലെക്കു കൂടെ വ്യാപിപ്പിക്കപ്പെട്ടതോടെ ഇസ്ലാമിക് സ്റ്റേറ്റ് ഇറാഖ് ആൻഡ് സിറീയ (ഐസിസ്) എന്നാക്കി പുനർനാമകരണം ചെയ്യപ്പെടുന്നത് ഈ ഘട്ടത്തിലാണു. എന്നാൽ സിറിയൻ ആഭ്യന്തര യുദ്ധമുഖത്തേക്കുള്ള ഐസിസിന്റെ കടന്നുവരവ് സിറിയയിൽ ബാഗ്ദാദി തന്നെ മുൻകൈ എടുത്ത് രൂപീകരിച്ച ജബഹത്തുൽ നുസ്രയുമായുള്ള ഭിന്നതയിലും ഏറ്റുമുട്ടലിലുമാനു കലാഷിചത്. ഐസിസിന്റെ ലക്ഷ്യവും പ്രവർത്തനമേഖലയും ഇറാഖിൽ മാത്രം പരിമിതമായ സമയത്ത്  സിറിയൻ പ്രക്ഷോപം ലക്ഷ്യംവെച്ചുകൊണ്ട് ആളും അർത്ഥവും നൽകി ജബ്ഹത്തുൽ നുസ്രയുടെ രൂപീകരണത്തിനു വഴിതെളിയിച്ചത് ഐസിസിന്റെ ആദ്യരൂപമായ ഇസ്ലാമിക് സ്റ്റേറ്റ് ഓഫ് ഇറാഖ് ആയിരുന്നു എന്നത് ഇവിടെ ശ്രദ്ധേയ്യമാണു. 

അതെസമയം  ഇന്നു ലോകം മുഴുവൻ ഐസിസ് ചർച്ചചെയ്യപ്പെടുന്നത് പ്രധാനമായും രണ്ട് കാരണങ്ങൾ കൊണ്ടാണു, ഒന്നു നൊടിയിടെ സിറിയയിലും ഇറാഖിലും നെടിയ നിർണ്ണായക വിജയങ്ങൾ. രണ്ട് കീഴടക്കപ്പെട്ട പ്രദേശങ്ങൾ കേന്ദ്രീകരിച്ചു കൊണ്ട് നടത്തിയ ഖിലാഫത്ത് പ്രഖ്യാപനം. ഇതുകൊണ്ടുതന്നെ മുസ്ലിം ലോകത്തു നിന്നു ഒരേ സമയം ആശയും ആശങ്കയും അതോടൊപ്പം ശക്തമായ വിമർശനവും ഐസിസിനെതിരെ തിരിയുന്നു. വെറും ആയിരങ്ങൾ മാത്രം അംഗസംഖ്യയുള്ള ഐസിസ് ഇറാഖിലും സിറിയയിലും സർക്കാർ സൈന്യങ്ങളെയും കുർദ്- ഷിയാ വംശീയ സൈന്യങ്ങളെയും വകഞുമാറ്റിക്കൊണ്ട് നടത്തിയ മുന്നേറ്റങ്ങളിൽ പലരും സംശയം പ്രകടിപ്പിക്കുന്നുണ്ട്. ഐസിസിനു പിന്നിൽ ആര്? ഐസിസിന്റെ ലക്ഷ്യം എന്തു? സാമ്പത്തിക-ആയുധ പിൻബലം എവിടെ നിന്നു ഇത്യാധി അനവധി സംശയങ്ങൾ ഒരു സംഘടന എന്ന നിലക്ക് ഐസിസിനെതിരെ തിരിയുമ്പോൾ പലരും വിശേഷിപ്പിച്ചതു പോലെ ഒരു യൂണിവേഴ്സിറ്റി ചെയർമ്മാനെ പ്രഖ്യാപിക്കുന്നതിലും ലാഘവത്തോടെയുള്ള ഖിലാഫത്ത് പ്രഖ്യാപനത്തെയാണു പണ്ഡിതരടങ്ങുന്ന വലിയൊരു വിഭാഗം ചോദ്യം ചെയ്യുന്നത്. ഈ ഖിലഫത്ത് പ്രഖ്യാപനത്തിനു സാധുത ഇല്ലെന്നും ഇവർ പ്രഖ്യാപിക്കുന്നു. 

ഐസിസിനു പിന്നിൽ പ്രധാനമായും അമേരിക്കയും സൗദിയുമാണെന്നാണു ഒരു വാദം. മേഖലയിലെ ഷിയാ ബ്ലോക്കായ ഇറാന്റെ സ്വാധീനത്തിനു തടയിടുക എന്ന ലക്ഷ്യത്തോടെ സുന്നി വിഭാഗീയത എന്ന തുറുപ്പുചീട്ടിറക്കി കളിക്കുകയാണു അമേരിക്കൻ പിന്തുണയോടെ സൗദിയെന്നാണു ആരോപണം. എന്നാൽ ഇറാഖിൽ പുതിയൊരു അക്രമണത്തിനു അമേരിക്കൻ കോൺഗ്രസ് അനുമതി ലഭിക്കേണ്ടിരുന്ന ഒബാമ ഭരണകൂടം ആ കടമ്പതട്ടിമാറ്റി അധികം വൈകാതെ ഇസ്ലാമിക് സ്റ്റേറ്റിനെതിരെ ആക്രമണം തുടങ്ങുകയും ഐസിനെതിരെ ഖുർദുകൾക്കും യസീദികൾക്കും ആയുധവിതരണം നടത്തുകയും ചെയ്തുകൊണ്ടിരിക്കുന്ന പാശ്ചാതലത്തിൽ അമേരിക്കയാണു ഐസിനു പിന്നിലെന്ന വിമർശനത്തിന്റെ പ്രസക്തി നഷ്ടപ്പെടുകയാണു. ഇറാഖിൽ ഇസ്ലാമിക് സ്റ്റേറ്റ് കീഴടക്കിയ പല പ്രദേശങ്ങളും അമേരിക്കയുടെ വ്യാമാക്രമണത്തിന്റെ മാത്രം പിൻബലത്തോടെ ഇറാഖീ സേനയും ഖുർദ വംശീയ സായുധസംഘമായ പെഷമർഗയും തിരിചുവരുന്നതായ റിപ്പോർട്ടുകൾ വന്നുകൊണ്ടിരിക്കുന്നു. മാത്രമല്ല സിറിയയിലും സമാനമായ അമേരിക്കൻ സായുധഇടപെടലിനുള്ള സാധ്യതകൾ ആരാഞുകൊണ്ട് അറബ്ബ് രാജ്യങ്ങളെ മുന്നിൽ നിർത്തിക്കൊണ്ട് അമേരിക്ക നയതന്ത്രനീക്കം ശക്തമാക്കിയിരിക്കുന്നു. സിറിയയിലെ ഐസിനെതിരെ നിലപാടുള്ള വിമതർക്ക്  സൗദിയുടെ കാർമ്മികത്വത്തിൽ സായുധപരിശീലനം നൽകുവാനുള്ള പദ്ധതിയും അമേരിക്ക തയ്യാറാക്കിയിട്ടുണ്ടു. ചുരുക്കത്തിൽ ഐസിനു പിന്നിൽ അമേരിക്കയാണെന്നുള്ള വിമർശനത്തിനെ നിരാകരിക്കുന്നതാണു ഐസിനോടുള്ള അമേരിക്കൻ സമീപനം എന്നു വ്യക്തം. 

മറ്റൊരാരോപണം ഐസിനു പിന്നിൽ സൗദിയാണെന്നതാണു. സൗദി ഇതിനകം തന്നെ ഐസിനെതിരെ ശക്തമായ നിലപാടുമായി രംഗത്തുണ്ട്. ഐസിനെതിരെയുള്ള മേരിക്കൻ അക്രമണങ്ങൾക്കും സൗദി സർക്കാരിന്റെ പിന്തുണയുണ്ട്. എന്നു മാത്രമല്ല സൗദി നിലപാടിനെ അരക്കിട്ടുറപ്പിചുകൊണ്ട് മസ്ജിദുൽ ഹറം ഇമാം തന്നെ ഇസ്ലാമിക സ്റ്റേറ്റിനെതിരെ ഫതുവ പുറപ്പെടുവിപ്പിച്ചിട്ടുണ്ട്. മാത്രമല്ല അടുത്തിടെ നൂറോളം വരുന്ന ഇസ്ലാമിക സ്റ്റേറ്റ് പ്രവർതകരെയാണു സൗദി സർക്കാർ അറസ്റ്റ് ചെയ്തിരിക്കുന്നതു. അതിനേക്കാൾ പ്രധാനമായത് രാജഭരണം നിലവിലുള്ള സൗദി അറേബ്യയുടെ കാർമ്മികത്വത്തിൽ സൗദിയുടെ അയല്പക്കരാജ്യമായ ഇറാഖ് കേന്ദ്രീകരിച്ചുകൊണ്ട് ഒരു ആഗോള ഇസ്ലാമിക ഖിലാഫത്ത് സ്ഥാപിക്കാൻ മാത്രം വിഡ്ഡികൾ ആണോ സൗദി ഭരണകൂടം എന്ന ചോദ്യമാണു. പ്രത്യേകിച്ചും മക്കയും മദീനയും അടങ്ങുന്ന പുണ്യഭൂമികൾ ഇസ്ലാമിക് സ്റ്റേറ്റ് ലക്ഷ്യമിടുന്നുണ്ട് എന്ന റിപ്പോർട്ടുകൾ കൂട്ടിവായിക്കുമ്പോൾ ഇത്തരമൊരു ചരിത്രപരമായ മണ്ടത്തരത്തിനു സൗദി സർക്കാർ തയ്യാറാകുകയില്ല എന്നു തന്നെയാണു മനസ്സിലാക്കേണ്ടത്. 

ഫലസ്ഥീനിലെ സയണിസ്റ്റ് വിരുദ്ധ പോരാട്ടതിന്റെ പ്രതീകമായ ഹമാസിന്റെ വളർച്ച ആദ്യഘട്ടത്തിൽ പിഎൽഒ ക്കെതിരെയുള്ള സമാന്തര ഗ്രൂപ്പിന്റെ വളർത്തുക എന്ന നയത്തിന്റെ അടിസ്ഥാനത്തിൽ സയണിസ്റ്റ് ഭരണകൂടം അവഗണിച്ചതായുള്ള നിരീക്ഷണവും ചേർത്തുവായിക്കാം. മാത്രമല്ല ആഫ്ഘാനിലെ അധിനിവേശവിരുദ്ധ പോരാട്ടം നടത്തുന്ന താലിബാന്റെ നിർമ്മിതിക്ക് പിന്നിൽ പാക്കിസ്ഥാൻ ചാര സംഘടനായ ഐഎസ്ഐയും അമേരിക്കയും സൗദിയുമൊക്കെയണെന്നുള്ള ആരോപണങ്ങളും നിലവിലുണ്ട്. 
സിറിയയിൽ ബഷാറിൽ ആസാദിനെതിരെ പോരാടുന്ന സായുധഗ്രൂപ്പുകൾക്കെതിരെയുള്ള നീക്കമാണു ഐസിസ നെതിരെയുള്ള മറ്റൊരാരോപണം. സമാനമായ ആരോപണം ആഫ്ഘാനിലെ അധിനിവേശവിരുദ്ധ പോരാട്ടം നടത്തുന്ന താലിബാനെതിരെയും നിലവിലുണ്ട്. പാക്കിസ്ഥാനിലെ മതപാഠശാലകളിൽ നിന്നു രൂപംകൊണ്ട താലിബാൻ ആഫ്ഘാനിലെ ആദ്യവിജയം നേടിയത് സോവിയറ്റ അധിനിവേശസർക്കാരിനെതിരെ സായുധപോരാട്ടം നടത്തിയ മുജാഹിദുകൾക്കിടയിലെ ഇസ്ലാമിസ്റ്റുകൾ എന്നറിയപ്പെടുന്ന ഗുൽബുദ്ദീൻ ഹെഖ്മത്തിയാർ നേതൃത്വം നൽകുന്ന ഹിസ്ബെ ഇസ്ലാമിക്കെതിരെയായിരുന്നു എന്നത് ശ്രദ്ധേയമാണു. തുടർന്നങ്ങോട്ടുള്ള പോരാട്ടങ്ങൾക്കിടെ താലിബാൻ നിലംപരിശമാക്കിയത് സോവിയറ്റ് വിരുദ്ധ പോരാട്ടം നടത്തിയ വിവിധ മുജാഹിദ് ഗ്രൂപ്പുകളെയും നേതാക്കളെയുമായിരുന്നു. ആഫ്ഘാൻ ഭരണചക്രം പിടിക്കുവാൻ താലിബാനു മുന്നിലെ പ്രതിബന്ധങ്ങൾ ഇവരെക്കെയായിരുന്നു. പരസ്പരം തല്ലുകൂടുന്ന ഈ സായുധസംഘങ്ങളെ അതിജയിച്ചതിലൂടെയാണു താലിബാനു കാബൂളിൽ അധികാരം പിയ്യിക്കുവാൻ സാധിക്കുന്നതും.

വസ്തുതകൾ പരിശോധിക്കുമ്പോൾ അമേരിക്കൻ സൗദി ഗൂഡാലോചനസിദ്ധാന്തതിന്റെ ഇരകളെന്നതിനേക്കാളുപരി ഐസിന്റെ ആവിർഭാവത്തിനും മുന്നേറ്റത്തിനും കാരണകാകുന്ന വർത്തമാനകാല രാഷ്ട്രീയ സാഹചര്യമാണു മേഖലയിൽ നിലവിലുള്ളതെന്നു കാണാം. ഒരേസമയം അമേരിക്കയുടെയും ഇറാന്റെയും സാമ്രജ്യത്ത-വംശീയ താല്പര്യങ്ങളുടെ തിക്തഫലമാണു ഐസിസിന്റെ നിർമ്മിതിക്കും മുന്നേറ്റത്തിനും കാരണമായത്. സദ്ദാമിന്റെ സ്ഥാനഭ്രംശനത്തോടെ ഇറാഖിൽ അധികാരത്തിൽ വന്ന നൂരി അൽ മല്ലികിയുടെ നേതൃത്വത്തിലുള്ള ഷിയാ സർക്കാർ ന്യൂനപക്ഷമായ സുന്നികൾക്കെതിരെ നടത്തിയ അതിക്രമങ്ങളും വിവേചനങ്ങളും ഐസിന്റെ വളർച്ചയിൽ നിർണ്ണായപങ്കാണു വഹിച്ചത്. ഐസിസിന്റെ ആധിപത്യമുള്ള പ്രദേശങ്ങളിലെ തദ്ദേശവാസികളുടെ പിന്തുണ ഐസിസിനു ലഭിക്കുന്നതും ഈ പശ്ചാതലത്തിലാണു.  കൂട്ടത്തിൽ സദ്ദാമിന്റെ പഴയ ബഅസ് പാർട്ടി അംഗങ്ങളും സൈന്യാധിപരും അവരുടെ ആയുധങ്ങളും ഐസിസിന്റെ ഭാഗമായതോടെ കുറ്റമറ്റ സായുധസേനയായി ഐസിസ് രൂപം പ്രാപിക്കുകയായിരുന്നു. യുദ്ധതന്ത്രങ്ങളൊരുക്കുന്നതിലും നിർണ്ണായക മുന്നേറ്റങ്ങൾ നടത്തുന്നതിലും ഈ രണ്ട് ഘടകങ്ങളും ഐസിസിനെ സഹായിച്ചതായി കാണാം. വിശിഷ്യാ അമേരിക്ക പരിശീലിപ്പിച്ച അച്ചടക്കമില്ലാത്ത ഇറാഖ് സൈന്യത്തെ അതിജയിക്കുവാനും അമേരിക്ക അവർക്ക് വാരിവിതറിയ ആയുധകൂമ്പാരങ്ങൾ സ്വന്തമാക്കുവാനും ഈ സൈനീകപാടവമാണു ഐസിസിനെ സഹായിചതു. പാക്കിസ്ഥാൻ സൈന്യത്തൊടെ കിടപിടിക്കുന്ന ആയുധങ്ങൾ തങ്ങൾ സ്വന്തമാക്കിയെന്ന് ഐസിസ് അവകാശപ്പെടുന്നത് ഈ പശ്ചാതലത്തിലാണു. മാത്രമല്ല കീഴടക്കപ്പെട്ട പ്രദേശങ്ങളിൽ എണ്ണ കിണറുകളിലെ വരുമാനവും ഇപ്പൊൾ ഇവർക്ക് ലഭിക്കുന്നു. പ്രധാനമായും കരിഞ്ചന്തയിലാണു എണ്ണ വിൽക്കപ്പെടുന്നതു. തുർക്കിയും സാക്ഷാൽ സിറിയയും ഈ കരിഞ്ചന്തയുടെ ഗുണഭൊക്ക്താക്കൾ ആണെന്നതും ശ്രദ്ധേയമാണു.

ചുരുക്കിപ്പറഞ്ഞാൽ പശ്ചിമേഷ്യയിൽ ഇസ്ലാമിക് സ്റ്റേറ്റ് ഇന്നൊരു യഥാർത്ഥ്യമാണു. ഇറാഖിന്റെ മൂന്നിലൊന്നും സിറിയയുടെ നാലിലൊന്നും ഭാഗങ്ങൾ ഇപ്പോൾ തന്നെ ഇവരുടെ അധീനതയിലാണു. ഈ പ്രദേശങ്ങൾ ഇന്നത്തെ ബ്രിട്ടന്റെ വലുപ്പത്തൊളം വരും. മാത്രമല്ല വലിയൊരു ജനസഞ്ചയവും ഈ പ്രദേശങ്ങളിൽ അതിവസിക്കുന്നു. ഒരു സായുധ ഗ്രൂപ്പെന്ന പരിമിതിയെ മറികടന്നുകൊണ്ട് സ്വാധീന മേഖലയിൽ സമ്പൂർണ്ണമായ സർക്കാർ സംവിധാനത്തിലേക്ക് ഇതിനകം തന്നെ ഇസ്ലാമിക് സ്റ്റേറ്റ് മുന്നോട്ടുപോയിട്ടുമുണ്ടു. പിടിച്ചടക്കിയ സ്ഥലങ്ങൾ കേന്ദ്രീകരിച്ചുകൊണ്ടുഌഅ ഖിലാഫത്ത് പ്രഖ്യാപനം, അതിനു അനുകൂലവും പ്രതികൂലവുമായി ലോകത്തിന്റെ വിവിധഭാഗങ്ങളിൽ നിന്നുയരുന്ന പ്രതികരണങ്ങൾ എല്ലാം തന്നെ പശ്ചിമേഷ്യയിൽ പുതിയൊരു യുദ്ധമുഖത്തിനാണു തുടക്കം കുറിച്ചിരിക്കുന്നതും. ഇത്രയും കാലം പരസ്പരം ശത്രുവെന്നു പറഞ്ഞിരുന്ന ഇറാനും അമേരിക്കയും സൗദിയുമൊക്ക് പരസ്പരം സഹരിച്ചുകൊണ്ട് പൊതുശത്രുവിനെതിരെ സംയുക്ത സൈനീകനീക്കം നടത്തുവാനുള്ള സാഹചര്യവും തള്ളിക്കളഞുകൂടാ.

പി.കെ നൗഫൽ

http://www.thejasnews.com/index.jsp?tp=det&det=yes&news_id=201408123183028891

No comments:

Post a Comment